ILOILO CITY- Nagsaka na sa 12 ka tawo ang patay sa sulod sang nagligad nga 10 ka adlaw sa tunga sang paglaslas sang mabaskog nga winter storm sa California, United States of America.
Ginatos ka libo nga mga pumuluyo ang wala sang kuryente kag nagapadayon ang mass evacuations bangud sa ginapaabot nga paglaslas sang dugang nga cyclones.
Pila sa mga ginpa-evacuate amo ang mga residente sang elite coastal enclave nga Montecito kun sadiin naga-istar ang mga celebrities nga ginalakipan nanday Duke and Duchess of Sussex – Harry kag Meghan – Oprah Winfrey kag Ellen DeGeneres.
Indi pa maathag kun yara sa ila balay si Prince Harry kag ang iya pamilya.
Suno kay Bombo John Tacapan, International Correspondent sa Californai, magluwas sa baha, may yara man sang landslide kag posible pagluntad sang avalanche sa mga nabukid nga bahin sang estado.
Ginabanta nga masobra sa 34 million Californians ang ginabahaan ukon kapin 90% sang population sang estado kag 10% population sang bilog nga pungsod.
