Amat-amat na nga nagabalik sa normal ang air traffic operation sa Estados Unidos sang Amerika matapos sang ginpahayag nga iregularidad sa sistema rason nga na-delay ang masobra 7,600 ka flights paguwa kag pasulod sa pungsod.
Suno sa Federal Aviation Administration (FAA), apisar nagbalik na ang operasyon, lauman sa gihapon ang delays bangud naggilinutok na ang mga eroplano sa gates sang airlines.
Una na nga ginpahayag sang mga opisyal nga tuga ini sang iregularidad sa Notice to Air Missions system ang amo ang nagapadala sang vital nga mga impormasyon sa mga piloto samtang yara sa kahawaan.
Apektado ang airports sa bilog nga Amerika (halin sa Denver pa Atlanta pa New York City.)
Ginpahayag man sang flight tracking website nga FlightAware nga amo ang naga-track sang delays kag cancellations nga magluwas sa masobra 7,600 ka delayed nga flights, masobra man sa 1,100 ka flights ang ginkanselar.
Ini ang una nga tion sa sulod sang halos duha ka dekada nga grounded ang flights sa Estados Unidos bangud sa computer glitch.
Napahibalo na kay US President Joe Biden ang computer glitch, kag sa subong, wala pa sang ebidensya suno sa White House nga may nagasaad nga may natabo nga cyberattack.
Ginpahayag man sang White House Press Secretary nga nagapangayo si Biden sang “full investigation”. ##
