ILOILO CITY- Nagapanawagan ang Office of the Election Officer sa Iloilo sa tanan nga mga kwalipikado nga Sangguniang Kabataan voters nga indi na paghulaton pa ang deadline sa Enero 31.
Sa interview sang Bombo Radyo kay Mr. Jonathan Sayno, Election Assistant II sa Office of the Election Officer- Iloilo City, iya ginpahayag nga tuman ka nubo subong sang turn-out sang registration kun ipaanggid sang nagligad.
Sa subong suno sa natungdan, naga-average lamang sang 50 registrants sa isa ka adlaw.
Dugang pa ni Sayno, bukas ang mga satellite offices alas-otso sa aga tubtob alas-singko sa hapon, Lunes tubtob Sabado.
Yari ang schedule sang registration sa mga satellite offices: Festive Walk Mall-Iloilo, tubtob pa sa January 13;Barangay Lanit, Jaro Multi-purpose Hall, January 14;Robinsons Jaro, January 16- 20; Barangay Sto. Niño Norte, Arevalo Barangay Hall, January 21; Robinsons Place Iloilo City, January 23-31 magluwas sa Domingo, January 29.
Ang mga aplikante nga naga-edad 15-17 ang mahimo nga mag-register para sa Sangguniang Kabataan Elections samtang ang naga-edad 18 pasaka ang mahimo magparehistro bilang regular voters.
Lakip sa mga transaction nga ginabaton amo ang application for registration, transfer/ transfer with reactivation, reactivation, change/ correction of entries.
Ang Barangay kag Sangguniang Kabataan Elections ang patigayunon sa katapusan nga Lunes sang Oktubre subong nga tuig 2023.
