ILOILO CITY- Magapatigayon sang School Sports Program ang Department of Education umpisa subong nga Enero.
Sa interview sang Bombo Radyo kay Mr. Nicasio Valenzuela, Division Sports Officer sang Deped Division of Iloilo, iya ginpahayag nga ini ang ginkasugtan sang Department of Education Central Office sa pagsinapol nga iya man gintambungan sang nagligad nga Disyembre.
Suno sa iya, base sa calendar sang ahensya para sa School Sports Program, subong nga Enero patigayunon ang Intramurals kag ang Municipal level meet, pagasundan sang congressional meet sa Pebrero, sunod amo ang division meet kag inter-division meet.
Ginpahayag ni Valenzuela, nga sa congressional meet, may yara sang bag-o nga format nga ipatuman kun sa diin wala sang exclusive host sang hinampang kundi sa lain-lain nga venue.
Ini nga format ang maga-feature man sang home and away games kun sa diin sa kada matapos ang hampang, papaulion ang mga atleta kag wala sang may matabo nga housing sang mga players.
Sa tagsa ka pagtakop sang meet, may yara sang patigayunon nga selection process sa winning kag losing teams agud i-evaluate ang mga players kun sin-o ang magabug-os sang team nga maga-proceed sa Division level meet.
Suno kay Valenzuela, may yara man sang qualifying requirements para sa tagsa ka event kag kinahanglan nga malab-ot ini sang atleta.
Dugang sang natungdan, sa subong, wala pa sang final guidelines sa mga sports events kag ini ang istoryahan pa sang natungdan nga mga sports officials sang Department of Education.
Patigayunon naman ang Palarong Pambansa sa Hulyo.
