Buenavista, Guimaras – Wala na gin-report sa kapulisan kag ginpaagi nalang sa settlement sang mga grupo sang kalalakihan ang pagbayad sang halit nga nagtuga sang komosyon sa highlights sang Palayag Festival sa Buenavista, Guimaras sang Enero 15.
Sa interview sang Bombo Radyo kay Police Major Jefrey Ferer, hepe sang Buenavista Municipal Police Station, iya ginpahayag nga pabati-bati kag pagbayluhanay sang makahang nga tinaga ang rason sang komosyon sang duha ka grupo nga lunsay tupaday man lang sang amo nga tion.
Suno kay Ferer, gin-settle sang mga grupo ang danyos sang ila halit sa tag-iya sang ilimnan.
Nagdangat sa P6,000 ang ginbayaran sang duha ka grupo.
Matandaan nga makit-an sa video ang pag-lampusanay sang monobloc chairs kag botelya sang duha ka grupo nga nahamtang sa plaza sang Buenavista, Guimaras.
