Chief of Hospital sang Western Visayas Sanitarium and General Hospital sa Sta. Barbara, ginatum-ok ang accountant kag budget officer sang ospital kun ngaa delayed ang sweldo sa mga personnel

ILOILO CITY- Duha ka mga indibidwal ang gintumod sang Western Visayas Sanitarium and General Hospital nga amo ang nagatuga sang delay sang sweldohanay sang mga Contract of Service personnel sa nasambit nga ospital.

Sa ginpatigayon nga committee hearing sa Sangguniang Panlalawigan, ginbuyagyag sang chief of hospital nga si Dr. Judy Ann Dumayas, nga sanday Mr. Conrad Sorongon, accountant, kag Ms. Gerville Guartero, budget officer sang Western Visayas Sanitarium and General Hospital amo ang rason kun ngaa na-delay ang sweldo sang mga Contract of Service personnel sang nagligad nga tuig.

Suno kay Dumayas, indi makahibalo ang budget officer sang iya nga ulubrahon kag ginadiktahan lang sang accountant.

Sa pagkamatuod, pahayag sang chief of hospital, sang nagpadulong sa Western Visayas Sanitarium and General Hospital si Department of Health Undersecretary Pancratius Cascolan, ginpamangkot ni Dr. Dumayas ang mga opisyal kun sa diin na ang payroll kag nagsabat ang Human Resource Management Officer nga yara sa Accounting Office.

Nagpahayag man si Cascolan, suno kay Dr. Dumayas, nga kun ginpirmahan lang kuntani ni Mr. Sorongon ang payroll, wala kuntani na-delay ang sweldo sang mga empleyado.

Pahayag ni Dr. Dumayas, ang sweldo sang mga contract of service personnel para sa bulan sang Nobyembre ang nahatag sang Disyembre 27 matapos gina-alegar gin-tamper ini ni Mr. Sorongon rason nga wala ma-release sang Disyembre 23, las dos sang hapon nga amo ang cut- off sa bangko.

Natukiban man sang Department of Health Region 6 pinaagi sa Commission on Audit nga may ginapangkakas nga pangalan sang empleyado sa payroll si Mr. Sorongon.

Bukas naman ang Bombo Radyo sa paathag nanday Mr. Sorongon kag Ms. Guartero.