ILOILO CITY- Nagpahanumdom ang chairman sang Committee on Public Safety sang Iloilo City Council sa tagdumalahan sang mga establishments nga mangin responsable sa ila operasyon sa Dinagyang Festival 2023.
Sa interview sang Bombo Radyo kay Iloilo City Councilor Sedfrey Cabaluna, chairman sang Committee on Public Safety sa konseho, iya ginpahayag nga kinahanglan mahangpan sang pamunuan sang mga establishments kag mga kiosko ilabi na ang nagabaligya sang ilimnon, nga katungdanan nila ang ila mga customer.
Suno kay Cabaluna, nagakadapat lang mga makahibalo magpatunga ang establishment ilabi na kun matabo nga indi paghangpanay sa tunga sang mga customer agud indi na maglala pa.
Sa ila bahin, ginpahayag sang konsehal nga magalibot man sila upod sa Public Safety and Transportation Management Office agud ma-check ang palibot kag makabulig sa pagpaluntad sang kalinong kag katawhay.
Samtang, hatagan sang konsiderasyon ang mga kiosko nga nagaserbe sang ilimnon sa botelya sa tion sang Dinagyang Festival 2023.
Sa interview sang Bombo Radyo kay PCol Leo Batiles, director sang Iloilo City Police Office, iya ginpahayag nga ini bangud nga indi malikawan nga bottled alcoholic beverages ang ibaligya sang kalabanan nga mga kiosko.
Suno kay Batiles, kinahanglan lang nga himuson gilayon ang mga botelya sa lamesa kun maubos na ang ilimnon agud indi magkalabuka kun may yara gid man sang magluntad nga ilinaway.
Nahibaluan nga ginaabisuhan man ang mga kiosko nga utdon ang punta sang mga barbecue sticks bilang kabahin sa pagsunod sa guidelines sang Philippine National Police kag Bureau of Fire and Protection.
Ginadumilian man ang pagdala sang taliwis nga mga butang ukon hinganiban agud indi magamit sa pagpanghalit sa iban.
