ILOILO CITY – Nagdangat sa 100,000 metric tons sang bombay ang nauyang sang 2022.
Suno sa Department of Agriculture, 35 percent sang nauyang ang bangud sang kakulang sang pasilidad kaangay sang cold storages kag indi insakto nga handling.
Nagdangat sa 283,172 metric tons sang pula kag yellow nga bombay ang gin-ani nagikan sa ginabanta 30,000 hectares sang production area.
Suno pa sa agriculture department, ang bulanan nga requirement ang nagdangat sa 21,679 metric tons.
Ang figures ang naggwa kadungan sang ginapahayag kakulang sa suplay nga nagresulta sa pagtimbu-ok sang presyo sini sang Disyembre.
Ang iban pa nga rason nga naga-apekto sa presyo kag suplay sini amo ang pagsaka man sang presyo sang production inputs lakip na ang abono kag binhi; manubo nga lebel sang mechanization kag mahal nga labor cost; mahal nga marketing kag distribution scheme; limitado nga credit facilities; kag indi alalangay nga impormasyon.
Agud nga masolbar ang isyu sa onion industry, ginpahayag sang Department of Agriculture nga natalana ini nga maglunsyar sang Optimization and Resiliency In the Onion Industry Network Program.
Suno pa sa ahensya, ang ini nga programa ang may katuyu-an nga masuportahan ang local onion industry kag subong man, mapataas ang produksyon kag income sang onion stakeholders sa pungsod.
Ini ang maka-promote man sang isa ka competitive, resilient, kag profitable onion industry nga magahatag sang mataas nga kalidad, kasarangan kag sustainable supply sang bombay agud nga malab-ot ang domestic demand.
Lakip sa mga stratehiya kag programa diri amo ang mahapos nga access sa credit loans nga mahimo nga magamit sa pagbakal sang gamit kag pagpatukod sang mga pasilidad.
Dugang pa sang agriculture department, may yara man sang regulatory activities kag iduso man ang pagtukod sang national information database para sa updated kag importante nga mga data sa produksyon kag marketing.
