Gintawag sang China nga “overreaction” ang ginhimo sang Estados Unidos sang Amerika nga pag-shoot down sang isa ka gina-alegar Chinese spy balloon nga nakit-an nga nagalupad sa teritoryo nga sakop sang North America.
Suno sa Beijing, ginlapas sang Estados Unidos ang “international practice” bangud naggamit gid ini sang pwersa agud nga atakehon ang balloon nga gintawag sang Beijing nga “unmanned civilian airship.”
Antes ang lihok sang Pentagon, pila ka adlaw man nga nagalupad-lupad sa North America ang amo nga balloon rason nga ginpang-untat ang operasyon sang tatlo ka airports bangud ginkabig ini nga isyu sa national security.
Ginkanselar man ang byahe ni Secretary of State Antony Blinken sa Beijing.
Gin-igu ini sang Pentagon paagi sa missile shot halin sa F-22 jet — operasyon nga ginlaragway ni US Secretary of Defense Lloyd Austin nga isa ka “deliberate and lawful action”.
Una na nga gin-ako sang China nga ila matuod ang amo nga “airship”, apang indi ini espiya suno sa Beijing kundi isa lamang ka weather balloon nga para sa civilian meteorological kag iban pa nga scientific purposes, apang bangud ginlupad sang hangin kag bangud limitado lang ang control capability, nakalab-ot ini sa teritoryo sang Amerika.
