Wala nagpalingkang ang Estados Unidos sang Amerika sa Hwasong-15 intercontinental ballistic missile nga ginpalupad sang North Korea.
Sa baylo nga mag-isol sa joint military drills kaupod sa South Korea, nagpatigayon ang Amerika sang joint air exercises kaupod sa South Korea kag Japan kag may gingamit pa nga strategic bombers.
Suno sa Joint Chiefs of Staff sang South Korea, ini nga exercise nga gin-updan sang F-35A, F-15K sang South Korea kag US F-16 fighters kag American B-1B bombers amo ang nagapakita sang “overwhelming” defense capabilities kag readiness posture sang ila nga mga kaalyado.
Ginpahayag nga ini man ang pamatuod sang “ironclad commitment” sang Estados Unidos nga depensahan ang Korean Peninsula.
Suno naman sa Defense Ministry sang Japan, nagpalupad ang pungsod sang F-15s sa tactical exercises sa ibabaw sang Sea of Japan kaupod sa US Armed Forces’ B-1 bombers kag F-16s.
Ini nga air drills ang gintabo isa ka adlaw matapos nagpalupad ang North Korea sang long-range ballistic missile. Ang ginhimo sang Pyongyang ang kasunod sang ila man paandam nga magabalos sila kun dayunon sang US kag South Korea ang ila nga joint military drills (nga kun Pyongyang ang pahambalon, isa na ka preparasyon para sa posible nga invasion’.
Matandaan nga sunod-sunod man nga ginkondenar sang Group of Seven, grupo sang pito ka leading seven world economies, ang ginhimo ni North Korean President Kim Jong-Un. ##
