Iloilo – Ginarekomendar ni Iloilo 2nd District Board Member Jun Mondejar, chairman sang Committee on Public Order and Safety sa Sangguniang Panlalawigan, ang liwat nga paggamit sang pondo sang National Task Force to End Local Communist Armed Conflict agud tapuson ang mga proyekto nga wala pa nakompleto.
Base sa guidelines, ang mga proyekto ang ginalauman nga matapos antes ukon mismo sa adlaw sang Disyembre 31, 2022, apang may ara sang 20% sang proyekto nga nabilin nga wala natapos.
Nahibaluan nga ang nabilin nga 20% nga pondo ang ginbalik sa national government.
Kaangot diri, naghingyo si Mondejar kay President Ferdinand “Bongbong” Marcos, Jr., nga pondohan ang implementasyon sang wala matapos nga proyekto nga may katuyuan nga pasanyugon ang kahimtangan sang pangabuhi sang mga pumuluyo nga naga-istar sa nabukid nga bahin sa probinsya sang Iloilo, partikular na sa mga banwa sang Leon, Igrabas, Tubungan, kag Miagao.
Sa interview sang Bombo Radyo kay Mondejar, iya ginpahayag nga may yara sang persuasive power ang Presidente nga isa ka dako nga butang agud nga ma-impluwensyahan ang kongreso nga mahatagan sang igtalupangod ang mga proyekto nga wala sang pondo.
Suno kay Mondejar, dako gid kuntani nga bulig ang mga proyekto ilabi na sa mga pumuluyo nga mahimo maipalapit sa ila ang basic services kag facilities, kag mapasanyog ang peace and order situation sa mga nasambit nga kabanwahanan.
Sa subong, nagahulat nalang ang provincial board sang sabat halin sa presidente.
