Ginsikway sang mga trial judges sang International Criminal Court ukon ICC ang request sang defense team ni anay Presidente Rodrigo Duterte nga magpatuman sang mas istrikto nga proseso sa pag-verify sang digital evidence.
Sa desisyon sang ICC Trial Chamber III nga may petsa September 26, ginbalibaran ang request sang defense nga dugangan sang “expert verification” ang tanan nga open-source kag user-generated evidence nga ginapresentar sa korte.
Suno sa ICC, ang defense ang may panguna nga responsibilidad sa pag-identify kag pagpataas sang mga isyu parte sa tagsa ka ebidensya nga ginapresentar sang prosecution.
Matandaan nga ginrekomendar ni defense lawyer Peter Haynes ang pagbag-o sa E-Court Protocol bangod sa iya kabalaka sa pagdamo sang misinformation ukon “fake news” online.
Suno kay Haynes, may risgo nga mapuno sang mga materyales nga kuwestyonable ang relevance, authenticity kag reliability ang evidentiary record sang kaso.
Apang ginlaragway sang acting ICC prosecutor nga si Mame Mandiaye Niang ang request bilang indi makatarungan, indi kinahanglanon kag indi pabor sa episyente nga pagdumala sang kaso.
Suno sa prosecution, dapat case-to-case nga pagdesisyunan kon kinahanglan sang expert report ang isa ka open-source ukon user-generated evidence.
Sa baylo, gintugutan sang Trial Chamber III ang request sang prosecution nga dugangan sang URL ukon link metadata field ang tagsa ka open-source kag user-generated evidence nga ipresentar sa kaso. Suno sa prosecution, makabulig ini agud mas mahapos ma-identify ang original nga URL ukon link nga konektado sa ebidensya sang tion nga ini nakuha.
