Gin-report sang Department of Trade and Industry (DTI) nga stable gihapon ang presyo sang basic necessities kag prime commodities bisan nagapadayon ang pagsaka sang presyo sang krudo.
Suno kay DTI Secretary Ma. Cristina Roque, wala pa sila nakabaton sang request halin sa mga manufacturer para magpataas sang presyo sang mga nagapanguna nga balaklon.
Ginsiling ni Roque nga mahimo gihapon ma-check sang mga consumer ang updated price lists sang DTI nga kinahanglan ipakita sa mga grocery kag supermarket.
Nagapadayon man ang DTI sa pagpakigsapol sa mga manufacturer agud masiguro ang bastante nga supply sang mga nagapanguna nga balaklon kag malikawan ang hinali nga pagsaka sang presyo.
Nahibaluan nga gina-monitor sang ahensya ang kapin 204 ka stock-keeping units ukon SKUs sang basic necessities kag prime commodities.
Matandaan nga sang Mayo pa sang ulihi nga gintugutan ang price increase, nga naglakip sa sardinas, instant noodles, kape, bottled water, detergent kag laundry soap.#
