ILOILO CITY- Padayon pa nga ginaimbestigaran sang otoridad agud makilal-an ang tawo nga amo ang sa likod sang natabo nga magkasunod nga insidente sang bukas-kotse sa Brgy. San Antonio, Molo, Iloilo City.
Sa interview sang Bombo Radyo kay Punong Barangay Eric Gallego, iya ginpahayag nga kun basehan ang kuha sang closed circuit television, kaangay nga hangkilan na ang nasambit nga kawatan.
Nahibaluan nga nakuhaan sang footage ang pagbukas sang kawatan sang Sports Utility vehicle kun sa diin nataban niya angmga assorted items.
Apisar wala naman nakuhaan sang footage,ginapatihan nga ang nasambit nga lalaki man ang nagsulod sa isa man ka multicab malapit lang sa Sports Utility Vehicle kun sa diin nataban ang battery sang multicab.
Suno kay Gallego, sang amo nga tion, may nagluntad nga grassfire sa barangay kag posible ginhingalitan sang kawatan ang tsansa nga makapangawat samtang yara ang atensyon sang mga residente sa amo nga sunog.
Nagpaandam si Gallego sa tanan nga tag-iya sang mga salakyan sa barangay nga indi gid magbilin sang mga malahalon nga gamit sa salakyan kag ginpasiguro nga mas pasanyugon pa ang pag-monitor sang mga barangay tanod agud indi masulit ang insidente.
