Nagpaandam ang National Water Resources Board sang posible matabo nga water supply shortage sa pungsod bangud sa ginapanan-aw nga El Niño phenomenon nga posible mabatyagan sa second half sang tuig.
Suno kay NWRB Executive Director Sevillo David, bangud malaka lamang ukon mabuhinan ang pag-ulan kun may El Niño, posible nga magnubo ang tubig sa mga dam kag mabuhinan man ang suplay sa irigasyon.
“For now, we have an ample supply of water, but the Philippine Atmospheric, Geophysical and Astronomical Services Administration (Pagasa) has predicted the coming of the El Niño phenomenon, which will result in fewer rains. So, we need to prepare for this so that it will not affect our water supply,” suno kay David sa Laging Handa briefing kahapon, Marso 20.
Kun basehan ang data nagikan sa Department of Agriculture sang may El Niño halin sang 2018 tubtub 2019, nagdangat sa P8 billion ang balor sang halit sa agrikultura kag 250,000 ka mga mangunguma ang apektado.
Ang kabug-usan naman nga halit sang natabo ang droughts halin sang 2012 tubtub sa 2021 ang nagdangat sa masobra P34 billion.
Suno sa Department of Agriculture, ginahandaan na sini ang epekto sang El Niño, kag mahimo suno sa ahensya nga makabulig ang National Irrigation Authority sa pagpahagan-hagan sang impact paagi sa epektibo nga water management.
