Wala sang ihatag nga sweldo ukon anuman nga benepisyo kay Negros Oriental 3rd District Rep. Arnolfo Teves, Jr. matapos gindagdagan sang Kamara sang 60 ka adlaw nga suspensyon bangud sa padayon nga pag-absent apisar wala sang otorisado nga byahe sa luwas sang pungsod.
Ginpaathag ini ni House Secretary General Reginald Velasco matapos ang unanimous decision sang mga myembro sang Kamara nga i-suspinde si Teves.
Wala man sang kumpensasyon, office space, ukon anuman nga pribilehiyo nga ihatag kay Teves kaangay sa ginahatag sa iban nga mamalidha.
Depende na sa plenaryo suno kay Velasco nga mag-desisyon kun may hingadlan nga caretaker sa third district sang Negros Oriental samtang nga suspendido ang ila congressman.
Kagab-i, 292 ang nagpabor, wala sang nag-abstain, kag wala sang nagpamatok sang ginbotohan ang suspensyon sa amo nga mamalidha nga amo ang ginatudlo nga yara sa likod sang pagpatay kay Governor Roel Degamo.
Ini nga desisyon ang kasunod sang rekomendasyon sang House Committee on Ethics and Privileges sa pagpamuno ni Rep. Felimon Espares.
Una na nga ginhatagan si Teves sang lima ka adlaw agud magpakita, kag sang ulihi gindugangan pa gid sang 24 ka oras, apang wala ini nagbalik sa Pilipinas bangud suno sa iya, may pamahog sa iya seguridad kun makatapak na siya sa pungsod. ##
