Iloilo – Pagahiwaton subong nga adlaw, Marso 25, ang 2023 Earth Hour Celebration sa bug-os nga kalibutan.
Ini ang gin-organisa sang World Wide Fund umpisa sang 2007 sa Sydney, Australia.
Sa interview sang Bombo Radyo kay Rabbie Chris Carvajal, Chief sang Environmental Education and Information Unit sang Environmental Management Bureau Region 6, iya ginpahayag nga nalakip sa pag-obserba sang Earth Hour ang pagpatay sang mga suga kag devices sang isa ka oras agud mahagan-hagan ang epekto sang global warming.
Suno kay Carvajal, tinutuyo sang nasambit nga hilikuton ang pag-ugyon sang tagsa ka mga indibidwal sa pagprotehir sang planeta.
Kaangot diri, suno sa natungdan, tuman ka importante ang nangin simbolismo sang numero nga 60 nga nagakahulugan sang 60 minutos nga katumbas sang isa ka oras.
Nahibaluan nga bugusan sang 193 ka mga pungsod sa kalibutan ang 2023 Earth Hour Celebration.
Samtang, maga-umpisa ang Earth Hour sang 8:30 tubtob 9:30 sa gab-i.
