Kontraktor nga nagpatigayon sang roadworks sa Brgy. Taft North, Manduriao, I.C., sabton ang mga gastos sang tigulang nga naaksidente

Mandurriao, Iloilo City – Sabton sang kontraktor sang roadwork sa Barangay Taft North, Mandurriao, Iloilo City ang gasto sa pagpabulong sang lalaki nga naaksidente sa iya bisekleta bangud sa buho sa dalan.

Ang biktima amo si Vicente Baylen, 56, residente sang Barangay Oñate De Leon, Mandurriao, Iloilo City.

Samtang ang kontraktor sang project amo ang Converge ICT Solutions, Inc., kag sub-contractor naman ang Starconnect Telecoms, Inc.

Sa interview sang Bombo Radyo kay Baylen, iya ginkumpirma nga nagsugtanay sila sang kontraktor nga bayaran sini ang iya gasto sa naangkon nga mga kapilasan kun sa diin gintahi gid ang iya baba kag ilong bangud sang impact sang pagkatumba sini sa bike.

Nagapasalamat man ini bangud sabton man sang kontraktor ang mga adlaw nga wala ini nakasulod sa obra bangud wala pa nag-ayo ang iya mga kapilasan.

Nahibaluan nga ginpasementohan na sang Iloilo City Government ang porsyon sang dalan nga may buho kun sa diin nagluntad ang aksidente.