Iloilo – Ginpahayag sang National Irrigation Administration Region 6 nga nagahina na ang pagtubod sang tubig sa pila ka mga lugar sa probinsya sang Iloilo nga rason sang pagpatigayon sang clearing kag maintenance activities sang ahensya.
Sa impormasyon nga nabaton sang Bombo News Team, nag-untat na sa 15 ka adlaw ang suplay sang tubig sa talamnan sang Barangay Igang, Pototan, Iloilo.
Kaangot diri, apektado man ang Baragay Medina, Anilao, Iloilo kag Barangay Lapayon, Leganes, Iloilo matapos nga nawad-an man sang tubig ang irigasyon.
Sa interview sang Bombo Radyo kay Engr. Randy Alipis, Division Manager A sang Iloilo-Guimaras Irrigation Management Office, iya ginpahayag nga kinahanglanon ang maintenance activity agud mabalik ang maayo nga pagtubod sang tubig.
Suno kay Alipis, nagpahanumdom na ini sa mga mangunguma sa nagapadayon nga maintenance activity kun sa diin, natalana ang pagbalik sini sa normal sa bulan sang Mayo.
Sa subong suno sa natungdan, ginatutukan na sang mga ini ang nagakaigo nga solusyon agud indi na liwat pa nga mag-awas ang tubig kag magtuga sang hu-ol sa mga pumuluyo.
