Iloilo City – Nakit-an mismo sang anay Punong Barangay sang Baldoza, La Paz, Iloilo City ang pagluthang-patay sang mga riding in tandem sa mga biktima sa lugar.

Ang mga biktima amo sanday Jomar Mendoza, ginapahayag nga residente sang San Nicolas, La Paz; kag Edmund Mendoza alias Turling, 32, residente man sang nasambit nga lugar.

Sa interview sang Bombo Radyo kay former Punong Baragay Antonio Jaleco sang Barangay Baldoza, La Paz, iya ginpahayag nga sang gintsikyar niya ang ginhalinan sang lupok, nakit-an niya ang isa ka gunman nga nagbalik kag gintiro liwat ang isa sa mga biktima antes nagpalagyo.

Suno kay Jaleco, naghunahuna pa ini nga palupok ang iya nabatian.

Kaangot diri, narekober sa crime scene ang pulo ka mga basiyo sang .45 calibre pistol, air soft gun kay apat tanan ka mga sachet sang suspected shabu kay Mendoza.

Nahibaluan nga nakaagi na preso si Mendoza bangud sa iligal nga droga.

Nagapadayon naman ang imbestigasyon sang mga kapulisan sa nagluntad nga shooting incident.