ILOILO CITY- Tuman ka taas sang respeto kag pagdayaw sang isa ka anak sa iya amay nga isa ka World War II veteran.
Sa interview sang Bombo Radyo kay Ma. Lydia Guzman Callano, bata ni Private First Class Hesus Regoso Guzman nga nagaedad na subong sang 95, iya ginpahayag nga sang panahon sang giyera, 12 anyos pa lamang sadto ang iya amay kag ginbutigan pa ang edad sini kag ginhimo nga 14 agud makapa-enlist sa Reserve Officers’ Training Corps Hunters nga isa ka recognized guerilla group.
Suno kay Callano,nangin espiya sang gobyerno ang iya amay sa duha ka Japanese garrisons sa Manila sang amo nga tion.
Pahayag niya, diutayan man nga gin-execute ang iya amay matapos nga ginpasibangdan ini nga ginsabotahe ang radio room sang Japanese garrison apang wala nadayon ang pagpatay sa iya.
Suno pa sa iya, kaangay nga gin-ubayan gid sang Diyos ang iya amay nga sa pihak sang kapintas sang mga Hapones sang amo nga panahon, nakaluwas gid ang iya amay kag nagaserbe subong nga buhi nga testigo sang mga natabo sang amo nga giyera.
Sa subong suno kay Callano nga nagaserbe man nga President sang American Legion Auxiliary, may proyekto sila nga libro nga igabalhag nga may tig-ulo ‘Beyond Dons and Medals’ nga koleksyon sang mga maayo kag indi manami nga inagihan sang mga war veterans kalakip na diri ang iya amay.
Nahibaluan nga ginakomemorar subong nga adlaw ang ika-81 nga anibersaryo sang Araw ng Kagitingan ukon Day of Valor kun sa diin ginakilala indi lang Filipino war veterans nga napatay sa pagpangapin sa pungsod apang sa pagdumdom man sa tan nga nagtanyag sang honorable nga military service sang panahon sang giyera.
Isa naman ka seremonya ang ginpatigayon sa Balantang Memorial Cemetery National Shrine bilang pagkilala sa pagkabaganihan sang mga beterano.
