ILOILO – Nagapati ang isa ka retired army nga dako ang bulig sang National Task Force to End Local Communist Armed Conflict batok sa mga rebelde grupo sa Pilipinas.
Nahibaluan nga ang nasambit nga task force ang gintukod sa idalom sang Executive Order no. 70 agud malab-ot ang sustainable peace & development sa Pilipinas.
Sa interview sang Bombo Radyo kay Retired Colonel Guillermo Matiling Jr. sang Philippine Army kag myembro sang Veterans Federation of the Philippines, iya ginpahayag nga bangud sa pagpaninguha sang gobyerno nga pondohan ang task force, mas nangin madinalag-on ang operasyon sang mga otoridad agud malab-ot ang mga malayo nga mga lugar nga may yara sang presensya sang mga rebelde nga grupo.
Suno kay Matiling, mas napasangkad ang performance sang mga otoridad pinaagi sa mga high-tech nga mga gamit kaangay sang mga drones nga dako ang bulig sa mga operasyon.
Ginpahayag dugang sang natungdan nga base sa obserbasyon sini, madamo nga mga surrenderees ang nagbalik sa sabak sang gobyerno agud magkabuhi sang normal.
Nagalaom naman si Matiling nga antes matapos ang temino ni Presidente Ferdinand “Bongbong” Marcos Jr., wala kuntani sang problema sa programa sa pagpapas sang insurhensiya sa Pilipinas.
