Naga-guwa nga antes pa man natigayon nga napatay si Negros Oriental Governor Roel Degamo sa iya puluy-an sa Pamplona sang Marso 4, may duha na ka daan nga tuyo ang amo man gihapon nga mga suspects agud tumbahon ang gobernador — una, paagi sa paggamit sang rocket-propelled grenade, kag ikaduha paagi sa sniper.
Natukiban ini nga assassination plot paagi sa resolution sang panel of prosecutors sang Department of Justice nga napetsahan sang Abril 4.
Sa resolution, gin-quote ang suspect nga si Rogelio Antipolo, Jr. sa iya nga sworn statement kun paano sini nahibaluan ang plano sa pagpatay.
Ginpahayag nga Disyembre 2022, naggamit ang duha sa suspects sa helicopter ni Negros Oriental Rep. Arnolfo Teves agud magbakal sa Mindanao sang rocket-propelled grenades kag iban pa nga explosives.
Disyembre 23 kuntani una patyon si Degamo paagi sa granada apang ginrason nga wala nadayon ang mission bangud kulang sa manpower.
May gindugang nga tatlo ka lalaki kag sang gin-execute ang ikaduha nga attempt sang Pebrero 14, 2023 sang tion sang kasalang bayan ukon mass wedding kun sa diin sniper kuntani ang mapatay kay Degamo apang wala man gihapon nagmadinalag-on.
May gindugang pa gid nga tatlo ka lalaki sang Marso 2.
Gintudlo naman ang co-mastermind nga si Marvin Miranda nga amo ang nagpanagtag sang armas, ammunition, vests, kag magazines kag ang advance payment nga P20,000.
Matandaan nga Marso 4 sang natigayon nga nadayon kag napatay gid si Degamo ang nagsulong ang suspects sa iya compound.
Una naman nga ginpahayag ni Justice Secretary Boying Remulla nga may meeting ang task force subong nga Martes agud madiskusyunan ang kaso nga ipasaka batok kay Miranda kag Teves, kag agud matumod kun sin-o sa mga akusado ang maka-pasar bilang state witness.
