ILOILO CITY- Nagresign si Police Brigadier General Clifford Gairanod bilang Chief sang Philippine National Police – Highway Patrol Group o PNP-HPG matapos naglapta ang video kun sa diin makit-an ang anak niya nga si Police Captain Clifton Gairanod nga may ginpaluhod nga trainee sang HPG Executive Motorcycle Riding Course kag ginsumbag ini sang opisyal sa dughan sang pila ka beses.
Sa ginpagwa nga statement sang PNP, ginpahayag sang ahensya nga nagsulat si General Gairanod kay PNP Chief General Rodolfo Azurin Jr. para sa iya boluntaryo nga pagpanaog sa pwesto para mahatagan sang patas nga imbestigasyon kag batunon ang responsibilidad para sa natabo nga insidente sa isa ka resort sa Sariaya sang Abril 2.
Sa video, makit-an nga nag-untat lang ang opisyal sa pagsumbag sang nagreklamo na ang trainee bangud sa sobra nga kabaskog sang pagsumbag sa iya apang ginkadlawan lamang nila ang trainee.
Samtang ginasumbag ang trainee, ginpamangkot pa ni Captain Gairanod ang trainee kun sin-o ang abogado niya kag kasuhan siya sang physical injuries.
Nahibaluan nga ang Executive Motorcycle Riding Course ang bukas sa tanan nga personnel sang PNP ukon sa iban pa nga law enforcement agencies nga may ranggo nga major ukon mas mataas pa, government officials kag mga prominente nga civilian leaders kag business industry executives.
Katuyuan sini nga mahatagan sang edukasyon ang mga estudyante sa husto nga operasyon sang high performance motorbikes, traffic enforcement kag defensive motorcycle training.
Bag-o ginpasa ni General Gairanod ang resignation letter,ginsipa any niya sa pwesto ang iya nga anak kag ang iban pa nga mga miyembro sang training staff nga direkta nga involved sa insidente.
Bangod sa pagresign ni General Gairanod, gin-islan siya ni Police Brigadier General Raul L. Bargamento nga amo na subong ang magauyat sa PNP-HPG.
