ILOILO – Ginkalipay sang Police Regional Office 6 ang nangin pangkabilugan nga sitwasyon sang Western Visayas sang semana santa nga nakakuha sang marka nga “generally peaceful”.
Sa interview sang Bombo Radyo kay Police Major Mary Grace Borio, spokesperson sang Police Regional Office 6, iya ginpahayag nga nagnubo sang 8.74% ukon 313 ang narekord nga krimen subong nga tuig kun ipaangid sang 2022 nga may yara sang 343 nga recorded crimes.
Suno kay Borio, nagnubo naman sa 24 ang narekord nga mga focus crime incidents ukon 55.55% subong nga tuig kun ipaangid sang 2022 nga may yara sang 54 ka nga crime incidents.
Ang focus crimes ginalakipan sang murder, homicide, physical injury, rape, theft, robbery, car theft kag motorcycle theft.
Ginpahayag dugang sang natungdan nga nagakahulugan lamang ini sang madinalag-on nga kampanya sang kapulisan sa tion sang Semana Santa subong ngatuig.
Samtang, gindayaw naman ni Police Brigadier General Leo Francisco, director sang Police Regional Office 6 ang pagpanikasog sang mga kapulisan sa tagsa nila ka mga katungdanan agud mapabilin ang kalinong kag katawhay sa bug-os nga Western Visayas.
