Ginakabig sang kampo ni suspended Negros Oriental Third District Representative Arnie Teves, Jr. nga daku nga oportunidad para sa iya ang pagtambong sa Senate hearing agud nga malimpyuhan ang iya pangalan kaangot sa natabo nga pagpatay kay Governor Roel Degamo sang Marso 4.
Una na nga nagkomiter ang suspendido nga mamalidha nga virtual ini nga magatambong sa imbestigasyon sang Senado sa masunod nga semana.
Suno kay Atty. Ferdinand Topacio nga legal counsel ni Teves, lauman nga sa amo nga virtual hearing, indi pagkumprontahon ni Congressman Teves si Pamplona Mayor Janice Degamo nga amo ang asawa sang nagtaliwan nga gobernador.
Nagpanawagan man ini sa pamilya Degamo nga indi kuntani paghimuon nga pala-agyan ang Senate hearing para manghaboy sang anuman nga akusasyon batok kay Teves bisan nga wala man sang ginapakita nga ebidensya.
Una na nga ginpahayag ni Justice Secretary Boying Remulla nga makabig nga mastermind kag “executive producer” si Teves sa amo nga asasinasyon nga natabo sa Pamplona, Negros Oriental nga ginkamatay sang walo ka iban pa nga indibidwal.
‘UNFAIR’
Para naman kay Pamplona Mayor Janice Degamo nga asawa sang biktima, indi patas nga virtual lamang ang pagtambong ni Teves bangud personal gani nga magatambong sa Senate hearing ang pamilya sang mga biktima.
Ginpahayag pa sini nga talawit si Teves kag daw kaangay nga gina-spoil pa ini rason nga wala gihapon nakapauli sa Pilipinas tubtub subong.
Dugang pa sang asawa nga Degamo, dapat ipa-contempt si Teves kag dakpon.
Una na nga nagpahayag si Sen. Ronald “Bato” Dela Rosa nga chairman sang Senate Committee on Public Order and Dangerous Drugs nga “in aid of legislation” ang amo nga hearing nga maga-umpisa sa Abril 17 kag indi ini ang maga-desisyon kun guilty ukon indi si Teves. ##
