SAN MIGUEL, ILOILO – Dako ang epekto sa mga pasyente kag pumuluyo ang kalidad sang ginahatag nga health services sang Western Visayas Sanitarium and General Hospital bangud sa away sa tunga sang hospital chief kag accountant.
Ang hospital chief amo si Dr. Judy Ann Dumayas, samtang ang accountant naman amo si Mr. Conrad Sorongon.
Sa bahin sang accountant, naga-agi sa iya ang tanan nga papeles sang mga empleyado sang ospital.
May mga alegasyon nga mahinay ang lakat sang mga papeles sa accounting bangud sa ginapangayo nga dugang nga requirements, rason nga indi on time ang pagbaton sang sweldo.
Nahibaluan nga ginbuyagyag sang Department of Health Region 6 nga may yara sang irregularidad nga nagakatabo sa sulod sang nasambit nga ospital nga rason sang pag-atrasar sang sweldo sang mga contract of service personnel.
Una na nga ginpahayag ni Dr. Judy Ann Dumayas nga tuyo ni Sorongon nga kontrolon ang management humalin pa sang tyempo ni Dr. Annabelle de Guzman.
Sa interview sang Bombo Radyo kay Iloilo 2nd District Representative Michael Gorriceta, iya ginpahayag nga pagkatapos sang iya on the spot visit sa ospital, ginhuna-huna niya nga matapos ang indi paghangpanay sang duha.
Sa indi paghangpanay sang duha, makaluluoy ang mga empleyado sang ospital ilabi na ang mga contract of service kag job orders nga wala makabaton sang insakto nga sweldo.
Tuman nga ginakadismaya sang kongresista ang nagakatabo sa ospital nga kuntani, wala na nadalahig pa ang empleyado.
Gin-athag naman ni Gorriceta nga wala ini sang may gina-apinan sa duha.
Sa baylo, suno kay Gorriceta, nagakadapat nga mapadasig na ang resulta sang imbestigasyon sang fact finding committee bangud indi manami nga ehemplo kag imahe sa mga pumuluyo ang away sa sulod sang ospital.
