12 sa 43 ka mga rural health unit sa probinsya sang Iloilo, may yara na sang animal bite treatment center

ILOILO – May yara na sang 12 sa 43 ka mga Rural Health Unit sa Iloilo Province nga may animal bite treatment center.

Sa interview sang Bombo Radyo kay Dr. Rodney Labis, Chief sang Health Service Delivery Division sang Iloilo Provincial Health Office, iya ginpahayag nga kun may yara sang malapit nga animal bite treatment center, mas mapahapos ang pag-access sang mga tawo sa pagpabakuna batok sa rabies.

Suno kay Labis, nagpatigayon sang animal bite management and skills training ang Iloilo Provincial Health Office sa mga physicians kag nurses sang Rural Health Unit sa mga kabanwahanan kaangay sang Ajuy, Balasan, Barotac Nuevo, Banate, Sara, Dueñas, Cabatuan, Badiangan, Janiuay kag Batad.

Sa subong, nakatutok ang probinsya nga malab-ot ang zero-related human rabies death sa 2030 kag matigayon lamang ini kun may yara sang inter-agency collaboration agud malikawan ang transmission sang rabies to canine and humans.