Masobra P200,000 nga balor sang droga, na-recover sa street level individual sa buy bust operation sang City Drug Emforcement Unit sa distrito sang Jaro

ILOILO CITY – Dakop ang isa ka indibidwal sa ginpatigayon nga drug buy-bust operation sang City Drug Enforcement Unit sa Barangay Sambag, Jaro, Iloilo City.

Ini amo si Reinel Valguna alias ‘Chang’, 32, nagatrabaho bilang construction worker kag residente sang amo man nga barangay.

Sa interview sang Bombo Radyo kay Police Captain Val Cambel, pinuno sang City Drug Emforcement Unit Iloilo, iya ginpahayag nga masobra isa ka bulan ang ila monitoring kay Valguna antes natigayon nga naaresto.

Suno kay Cambel, nakuha kay Valguna ang walo tanan ka sachet sang suspected shabu nga may kabug-aton nga 30 ka gramos nga may standard drug price nga P204,000, kag P7,000 nga buy-bust money.

Nagpanugyan naman ang natungdan sa publiko nga likawan ang iligal nga mga buluhaton ilabi na ang pag-engage sa illegal nga droga bangud sang indi maayo nga epekto sa pamilya kag sa mga kabataan.

Preso na subong sa Jaro Police Station si Valguna kag maga-atubang sang kaso sa paglapas sa Republic Act 9165 ukon ang Comprehensive Dangerous Drugs Act of 2002.