ZARRAGA, ILOILO – Arestado ang nobyo matapos ginhimuslan ang iya nobya sa banwa sang Zarraga.
Ang suspek amo si Alyas “Dan”, 18, kag residente sang Barangay Malunang, Zarraga, Iloilo.
Nahibaluan nga natabo ang krimen sang 2021 kun sa diin lunsay mga menor de edad pa lamang ang magkahagugma.
Sa interview sang Bombo Radyo kay Police Captain Raphy Señeres, officer-in-charge sang Zarraga Municipal Police Station, iya ginpahayag nga nagkilalahay ang suspek kag biktima sa chat paagi sa pagpatigayon sang abyan sang biktima.
Suno kay Señeres, makapila man nga beses nga naghagaday ang duha nga magkitaay, apang sang nag-abot na ang tion nga nagkitaay na ang duha, diri na kag natabo ang krimen.
Nagpanugyan naman ang natungdan sa mga ginikanan ukon guardian nga bantayan gid ang mga anak nga menor de edad agud wala sang malain nga matabo sa mga ini.
Sa subong preso na ang suspek kag magaatubang sang kaso nga Rape by Carnal Knowledge kag wala sang gin-rekomendar nga pyansa.
