ILOILO CITY – Wala nakatambong si Iloilo City Councilor Sedfrey Cabaluna sa ginpatawag nga pagsinapol ni Mayor Jerry Treñas kaupod sang iban pa nga mga konsehal.
Ini matapos ang nangin mainit nga eksena sa sulod sang konseho matapos nainsulto si Councilor Plaridel Nava sa pagtawag ni Cabaluna nga “Manong Nava” sa diin ginsaruso ni Nava ang bataon nga konsehal.
Sang nagligad nga bulan, dyutayan man nga sumbagon ni Nava si Iloilo City Councilor Rex Sarabia matapos nga nakit-an sini nga nagakaon sang popcorn ang konsehal sa diin wala ini nagasunod sa proper decorum.
Sa interview sang Bombo Radyo kay Mayor Treñas, iya ginpahayag nga magapatawag ini liwat sang pagsinapol sa tion nga makabalik ini halin sa Guam.
Suno kay Treñas, nagalaum ini nga mangin maayo sa gihapon ang paghangpanay sang mga konsehal kag indi na maliwat pa ang natabo nga insidente.
Samtang, ginrason naman ni Iloilo City Councilor Cabaluna nga may yara ini sang prior commitment sa adlaw sang pagsinapol.
Sa interview sang Bombo Radyo kay Councilor Cabaluna, iya ginpahayag nga una na ini nga nakalisensya nga indi ini makatambong sa pagsinapol bangud sa kasakuon sini.
Suno kay Cabaluna, wala man ini nakahibalo nga ang pagsinapol ang may kaangtanan sa natabo nga tensyon sa konseho.
Nagpangayo naman sang pasaylo ang konsehal sa alkalde bangud wala niya mahibaluan ang agenda sang meeting.
Dugang pa sang konsehal, wala man ini naga-absent kun may yara sang importante nga mga meetings.
