ICPO, magapanikasog agud mapasiguro ang seguridad sang publiko kasunod sang plano sang Iloilo City Gov’t nga pagkinot sa kuryente

ILOILO CITY – Magapanikasog ang Iloilo City Police Office agud mapasiguro ang seguridad sang pumuluyo kadungan sang inisyatibo sang Iloilo City Government nga pagpatay sang mga streetlights sa syudad.

Ini matapos nga nagpagwa sang Executive Order No. 49 ang Iloilo City Government bilang pagsulundan sa pagpatay sang mga streetlights ‘las 4:00 sa kaagahon tubtob ‘las 6:00 sa aga agud magkinot sang kuryente.

Sa interview sang Bombo Radyo kay Police Colonel Joeresty Coronica, director sang Iloilo City Police Office, iya ginpahayag nga apisar isa ka pagpanghangkat ang pagpatay sang mga suga, kinahanglan sang mga ini nga mag-adjust sang security measures.

Ini bangud suno kay Coronica nga lapnagon ang krimen sa nasambit nga mga inoras ilabi na sa mga madulom nga mga lugar sa syudad kaangay sang Iloilo Esplanade.

Ginpahayag man sang natungdan nga magadugang ang talatapan sang mga police personnel kag patrolling agud malikawan ang ano man nga sahi sang krimen.