ILOILO CITY – Ginlunsyar na sang Iloilo City Government ang “Mental Health Ginhawa 2.0” nga isa ka programa nga nagasentro sa pagpasanyog sang mental health services sa syudad.
Nahibaluan nga ini ang una nga ginlunsyar sang 2020 bilang inisyatibo sang Iloilo City Government.
Sa interview sang Bombo Radyo kay Dr. Rebecca Conlu Gregorios, focal person on Mental Health sang Iloilo City Health Office, iya ginpahayag nga tinutuyo sang Iloilo City Goverment nga ibalik ang nasambit nga mental health program agud mabuligan ang mga Ilonggos nga nagakinahanglan sang bulig.
Suno kay Gregorios, nakatutok ini sa risk prevention ilabi na sa mga nagasuprer sang depression kag suicidal tendencies.
Ginpahayag dugang sang natungdan nga may yara sang nagkalain-lain nga aktibidad nga ginpreparar ang opisina kaangay sang breathing exercises, storytelling, kag photography contest.
Nakig-angot naman ang opisina sa mga eskwelahan ilabi na sa mga manunudlo kag guidance counselors agud mapalapnag ang programa sang syudad.
Sa subong, natalana ang pagpahamtang sang 24/7 hotline para sa tanan nga nagakinahanglan sang bulig.
