ILOILO CITY – Todo sa pagpanghanda na ang Ilongga Boxer nga si Irish Magno matapos nag-abanse semifinal round sa nagapadayon nga 32nd Southeast Asian Games sa Cambodia.
Nahibaluan nga si Magno ang nagtiglawas sa Pilipinas sa nanuhay-tuhay nga mga international boxing competitions kaangay nalang sa Asian Games, World Championships, kag na-qualify man ini sa 2020 Summer Olympics sa diin ini ang labing una nga female Filipino boxer nga na-qualify sa games.
Sa interview sang Bombo Radyo kay Magno nga tumandok sang Barangay Tamu-an, Janiuay, Iloilo, iya ginpahayag nga nakatutok ini sa pagkuha sang masunod nga gold medal para sa Pilipinas.
Suno kay Magno, ginkulbaan ini sa pagkontra sa pambato sang Myanmar nga si Nan A Mwe Hom bangud ini ang labing una nila nga away apang samtang padayon ang ila away,nabasa sini ang estilo sang kasumpong kag natigayon niya nga mapierde ini.
Sa subong, nagapreparar na ang atleta sa masunod niya nga away sa Mayo 9 batok sa tiglawas sang Indonesia.
Nalakip naman sa Philippine boxing team amo sanday Markus Cezar Tongco, John Nobel Marvin, Norlan Petecio, James Palicte, Paul Julyfer Bascon, Ian Clark Bautista, Carlo Paalam, Rogen Ladon, Mark Lester Durens, Nesthy Petecio kag Riza Pasuit.
