Ginabantayan sang publiko ang oral arguments sang prosecution kag defense kag ang posible nga pagboto sang mga senador sa kontrobersyal nga voting threshold sa nagapadayon nga impeachment trial ni Vice President Sara Duterte-Carpio.
Sa interview sang Bombo Radyo kay Atty. Noel Palomado, former legal officer sang Commission on Audit kag auditor sang United Nations, iya ginpahayag nga may duha ka panan-aw sa pag-interpretar sang probisyon sang Konstitusyon may kaangtanan sa kinahanglanon nga boto para sa conviction sa impeachment trial.
Suno sa abogado, ang una nga panan-aw amo ang literal nga pagbasa sa probisyon sang Konstitusyon, nga nagasiling nga kinahanglan ang two-thirds sang tanan nga miyembro sang Senado para sa conviction.
Samtang, ang ikaduha nga panan-aw nagasiling nga indi lamang dapat lantawon ang amo nga probisyon nga nagaisahanon, kundi dapat ini i-interpretar kaupod sang iban pa nga may kaangtanan nga probisyon sang Konstitusyon agud mahibaluan kun paano dapat pagamiton ang voting requirement sa amo nga impeachment trial.
Pahayag ni Atty. Palomado, ini nga duha ka panan-aw amo ang ipresentar kag pagatalakayon sang prosecution kag defense sa oral arguments.
Ginpahayag niya nga pagkatapos sang oral arguments, magaboto ang mga senador para ma-resolbar ang isyu parte sa voting threshold nga pagagamiton sa conviction.
Dugang pa niya, posible gihapon nga magpadulong sa Supreme Court ang amo nga isyu, bangud mahimo pa ini mangin subject sang pagresolba sang korte.
