ILOILO CITY – Wala nakapasar sa water sample ang tubig nagikan sa Iloilo River, Batiano River kag Dungon Creek.
Ini matapos ang ginpatigayon nga pagsinapol sang Iloilo City Environment & Natural Resources Office, Environmental Management Bureau, kag Department of Environment and Natural Resources subong nga adlaw.
Ang water sampling ang ginahimo agud hibaluon kun may yara sang contaminants ang tubig sa diin makatuga sang problema sa ikaayong lawas kaangay sang gastrointestinal illness, reproductive problems, kag neurological disorders.
Sa interview sang Bombo Radyo kay Engineer Neil Ravena, pinuno sang Iloilo City Environment & Natural Resources Office, iya ginpahayag nga ang nasambit nga mga suba ang napaslawan nga makapasar sa water parameters, ilabi na ang Dungon Creek nga bantog bangud sa ginahaboy nga basura sang indi pa mahingadlan nga mga tawo.
Suno kay Ravena, pila sa mga solusyon agud matinluan ang mahigko nga tubig amo ang pagpahamtang sang waste booms, pagtanom sang mangroves, kag likawan ang paghaboy sang basura sa mga alagyan sang tubig.
Ginpahayag dugang sang natungdan nga may yara sang gin-augment nga tawo ang opisina agud magtsikyar sang mga pabrika kag commercial establishments nga wala nagasunod sa pagsulundan sang Iloilo City Government.
Sa subong, nakatutok ang Iloilo City Environment & Natural Resources Office sa pag-rehabilitate sang mga suba sa syudad sang Iloilo.
