Mga vendors sang Iloilo Central Market, nagpatigayon sang candle lighting protest kasunod sang pag-utod sang linya sang kuryente sa stalls sang pila ka mga manugbaligya

ILOILO CITY – Nagpatigayon sang candle lighting protest ang mga vendors sang Iloilo Central Market.

Sa interview sang Bombo Radyo kay Mr. Rex Donasco, presidente sang Association of Stall Owners and Transient Vendors (ASTRAVEN) kag 38 ka tuig na nga nagabaligya sa merkado, iya ginpahayag nga katuyuan sang nasambit nga protesta amo nga ipakita ang ila pagpamalabag sa ginpatigayon nga pag-utod sang linya sang kuryente sa stalls sang pila ka mga vendors.

Suno kay Donasco, sang Mayo 10, nag-umpisa ang pagpang-utod sang mga linya sang kuryente.

Ginpahayag sang natungdan nga nagpadulong sa merkado ang tiglawas sang Local Economic Enterprise Office sa diin ginpaathag sini nga isaylo nila ang linya sang kuryente sa mga bag-o nga stalls sa diin naghatag lang sila sang deadline nga Mayo 16.

Apang suno kay Donasco, indi pa sila mahimo magsaylo sa mga stalls bangud wala pa ini sang mga pirtahan, mga linya sang tubig kag iban pa.

Sa subong suno sa natungdan, nagasala pa ang mga vendors kun sa diin ang mga ini masaylo bangud wala man sang ginhimo nga nagakaigo nga koordinasyon sa ila.

Nagalaom man ang natungdan nga hatagan sang solusyon sang Iloilo City Government ang ila reklamo.