ILOILO CITY – Ginpa-Bombo sang mga residente sang Barangay Sambag, Jaro, Iloilo City ang indi maagwantahan nga baho halin sa mga basura sa material recovery facility (MRF).
Sa interview sang Bombo Radyo kay Nanay Pepay, residente sang nasambit nga barangay, makapila na ka adlaw nga wala ginakuha sang garbage collection team ang mga basura sang barangay.
Suno kay Nanay Pepay, dako nga huol ang baho para sa kaangay niya nga nagasuprer sang balatian.
Ginpahayag dugang sang natungdan nga gintinguhaan sang mga ini nga ulaan sang tubig nga may habon ang material recovery facility, apang nagapabilin sa gihapon ang baho.
Nagalaom si Nanay Pepay sa mga otoridad nga mahimo i-disinfect ang lugar agud indi maperwisyo ang mga pumuluyo nga naga-istar malapit sa material recovery facility.
Gin-athag naman ni Punong Barangay Romeo Jagorin sang Barangay Sambag, Jaro, Iloilo City nga ginatipon sang J.S Layson & Co., Inc. ang mga basura kada hapon, apang natiyempuhan lang nga wala sang available nga truck.
Sa interview sang Bombo Radyo kay Punong Barangay Jagorin, iya ginpahayag nga ginpatawgan na niya ang garbage collection nga pangkuhaon ang mga basura sa lugar.
Nagpanugyan naman ang opisyal sa mga pumuluyo nga indi na pag-ihaboy pa ang nagakadunot nga mga pagkaon agud indi ini magpanimaho.
Gilayon man nga ginkuha sang Iloilo City Government ang nagapanimaho nga basura sa material recovery facility nga nahamtang sa Barangay Sambag, Jaro, Iloilo City.
Sa interview sang Bombo Radyo kay Engr. Neil Ravena, pinuno sang Iloilo City Environment and Natural Resources Office, iya ginpahayag nga ang mga basura ang ginakabig nga ‘mixed waste’ bangud ginsamuan ini sang madunot kag indi madunot nga mga basura, rason nga naga-usbong ang baho sini.
Suno kay Ravena, kun may yara kuntani sang segregation, indi na maglala pa ang sitwasyon.
Bangud diri, magapatawag ang natungdan sang pagsinpaol kaupod sang mga barangay officials sang nasambit nga lugar agud pabantayan ang area sang mga nagahaboy kun sa diin posible nga may yara sang mga pangayaw nga nagahaboy man sang basura sa material recovery facility.
Sa subong, ginhawanan na sang Iloilo City Environment and Natural Resources Office ang material recovery facility agud tinluan.
