Hugot nga ginpanginwala ni Congresswoman Ann Matibag ang mga alegasyon sa iya ni Davao City Rep. Paolo Duterte kag sa iya bana nga si National Bureau of Investigation Director Melvin Matibag.
May kaangtanan ini sa ginapahayag ni Duterte nga mga issue sa infrastructure projects sa 1st district sang Laguna kun sa diin nagaserbe si Ann bilang isa ka kongresista.
Pinaagi sa iya social media post, ginhangkat ni Rep. Matibag nga kun may ara sang ebidensya ang kongresista sang Davao City, dapat sini nga ipakita kag ipasa sa mga awtoridad.
Suno man sa iya, preparado sya nga atubangon ang mga legal nga imbestigasyon kag handa man nga ihatag ang mga kinahanglanon nga dokumento.
Nahibaluan nga ang nangin alegasyon ni Duterte ang nag-ugat sa ginpahayag sang NBI Director nga paga-imbestigaran sang ila ahensya ang Davao City, ilabi na nga may ara sang ginaalegar malapit 50 ka ghost kag substandard flood control projects sa nasambit nga lugar.
