Pabor ang mga bolanteros sa Terminal Market sa plano nga indi pagpasudlon ang mga menor de edad sa sulod sang merkado halin alas-nuwebe sang gab-i tubtob alas-kuwatro sang kaagahon.
Sa interview sang Bombo Radyo kay Roger Fernandez Pajotea, presidente sang mga bolanteros sa Terminal Market, iya ginpahayag nga pabor sila sa amo nga tikang bangud may mga kabataan nga nagahatag sang perwisyo sa ila sa sulod sang merkado.
May insidente nga nagalinagsanay ang mga ini kag may ara man sang naga-sulod sa merkado nga may dala nga kutsilyo.
Isa pa sa ginatudlo nga problema nila amo ang mga insidente sang pagpangawat kun sa diin involved ang mga minors.
Base man sa ila obserbasyon, kadam-an sa mga kabataan nga nagaobra sang mga indi maayo nga buluhaton indi man mga kabataan sang mga vendor.
Bangud sini, ginpahayag ni Pajotea nga mas maayo nga indi na lamang pagpasudlon ang mga menor de edad sa amo nga oras agud maprotektahan man ang seguridad sang mga manugbaligya.
