Ginbuyagyag sang Makabayan bloc sa Kamara nga natalana nga aprubahan sang Senado ang version sang kontrobersyal nga proposed Maharlika Investment Fund (MIF) kun sa diin gamiton sa gihapon ang kuwarta sang mga Pilipino halin sa Government Service Insurance System (GSIS) kag sa Social Security System (SSS).
Matandaan nga sa bersyon sang hagna sa Kamara, ginkakas na ang paggamit sang pension funds bangud sa todo nga pagpakamaot nga nabaton halin sa publiko.
Apang suno sa Makabayan bloc, samtang nga wala na nakatutok ang mga pumuluyo sa sini nga isyu, ginbalik sa Senate version sang hagna ang paggamit sang pension funds.
Sa statement sang mga mamalidha, ginpahayag man nga sa Senate version, ginpasakaan man ang capitalization sang Maharlika Investment Corporation sa P500 billion nga halin lang anay sa P75 billion.
Ang porsyon sa sini nga pondo ang kuhaon gikan sa GSIS kag SSS.
“We are dismayed that the Senate is choosing to disregard the widespread sentiment expressed by its workers in the private and public sector throughout the country for the government to keep its hands away from their pension funds,” suno sa Makabayan bloc.
Kun matandaan, Disyembre 2022 sang gin-aprubahan sa Kamara ang MIF bill. Ginlista sang House version ang Land Bank of the Philippines, Development Bank of the Philippines, Philippine Gaming and Amusement Corp., kag Bangko Sentral ng Pilipinas bilang mga contributors.
Isa si House Speaker Ferdinand Martin Romualdez sa authors sang sini nga hagna kag suportado man ini sang economic cluster sang gobyerno sa pagpanguna ni Finance Secretary Benjamin Diokno.
Ginalantaw naman sang economic managers nga mahimo ini nga layi antes pa man ang State of the Nation Address (SONA) ni President Ferdinand “Bongbong” Marcos Jr. sa Hulyo. #
