ILOILO CITY – Padayon ang pagpanghanda sang probinsya sang Batanes sa posible pag-igo ni Super Typhoon Mawar.
Base sa forecast, sa tion nga magsulod sa pungsod ang bagyo, ang sentro sini ang malapit sa Batanes-Babuyan archipelago.
Sa interview sang Bombo Radyo kay Cesar Roldan Esdicul, Provincial Disaster and Risk Reduction Officer sang Batanes, iya ginpahayag nga bilog nga probinsya ang mangin apektado sang bagyo bangud nga lunsay coastal municipalities ang nagabug-os diri.
Suno kay Esdicul, nagpatigayon na sila sang pre-disaster risk assessment meeting upod sa response cluster agud nga hambalan ang mga pagpanghanda para sa bagyo.
Nagapadayon man ang pag-monitor sang opisina sa 10 ka mga Municipal Disaster and Risk Reduction Offices.
Ginpangbutangan na sang higot ang mga balay nga human sa light materials.
Gin-abisuhan man ang mga mangunguma nga anihon ang mga pananum nga mahino na nga ma-ani.
Dugang pa niya, nakahanda na ang halos anum ka libo nga food packs kag may nagdugang nga 850 boxes nga gindul-ong sang C130 plane sang Armed Forces of the Philippines.
Magluwas sina, may yara man sang bastante nga suplay ang National Food Authority.
