ILOILO CITY – Padayon nga nagapanindugan si Iloilo City Mayor Jerry Treñas nga legal kag constitutional ang Regulation Ordinance No. 338 nga nagatugot sa mga kapulisan kag traffic aides nga maka-confiscate sang driver’s license.
Ini matapos nga nagpahayag ang Department of Justice kag Department of Interior and Local Government nga wala sang otoridad ang Iloilo City Government nga magpatuman sang nasambit nga ordinansa.
Sa interview sang Bombo Radyo kay Mayor Treñas, iya ginpahayag nga korte lamang ang may gahom nga magdeklalar nga indi legal ang amo nga ordinansa.
Suno sa alkalde, wala naman sang dapat amyendaran sa ordinansa sa diin kun may yara man sang magpamatok, i-veto niya ini.
Nahibaluan nga ginaduso man ni Iloilo City Councilor Romel Duron ang pag-amyendar sang ordinansa sa diin luyag sang konsehal nga imbes ihatag ang driver’s license, mahimo na lang nga i-surrender ang ano man nga valid ukon government-issued identification card.
