Kaso nga ipasaka ni Iloilo City Councilor Plaridel Nava sa kontraktor kag opisyales sang DPWH nga naangot sa pagpatukod sang ungka flyover, suportado sang alkalde

ILOILO CITY – Natalana nga magpasaka sang kaso si Iloilo City Councilor Plaridel Nava sa Office of the Ombudsman sa Biyernes, Hunyo 2 batuk sa tatlo ka opisyales sang Department of Public Works and Highways kag sa duha ka opisyal sang International Builders Corporation nga naangot sa pagpatukod sang kontrobersyal nga P680-Million Ungka Flyover.

Kaso nga paglapas sa Republic Act 3019 ukon Anti-Graft and Corrupt Practices Act kag Gross Neglect of Duty ang ipasaka nga kaso sang konsehal.

Sa interview sang Bombo Radyo kay Councilor Nava, iya ginpahayag nga nagpabutyag sang suporta si Mayor Jerry Treñas sa iya tikang.

Suno kay Nava, mas mangin maayo ang dalagan sang kaso kun matukiban nga may liability ang mga indibidwal nga ginpasakaan sang kaso.

Ginpahayag dugang sang natungdan nga magapatigayon liwat sang condemnation rally ang mga cause oriented groups, opisyales sang simbahan kag nagkalain-lain nga mga sektor sa tion nga mapasaka na ang kaso.