Ginaplano na sang Russia ang natalana nga pagbisita ni President Vladimir Putin sa China.
Suno kay Kremlin spokesman Dmitry Peskov, iga-anunsyo lang ang petsa sang byahe ni Putin kun na-finalize na ini.
Suno pa sa natungdan, subong ang tyempo nga importante nga ma-maintain ang maayo nga bilateral Russian-Chinese relations.
Nahibaluan nga mas nagbaskog pa ang economic, trade, political kag military ties sang Russia sa China matapos nga naglain man ang tamdanay sini sa iban nga pungsod sa West nga amo ang nagaapin sa Ukraine.
Una na nga nagkomiter sanday Putin kag Chinese President Xi Jinping nga may yara sang “no limits” partnership sinemana antes naglunsar ang Russia sang “special military operation” sa Ukraine sang Pebrero 24, 2022.
Marso subong nga tuig sang nagbisita si Xi sa Russia kag may mga naselyuhan na nga mga economic kag iban pa nga agreements sa abyan sini nga si Putin.
Ang China amo ang isa ka major buyer sang Russian oil and gas. May gin-presentar ini nga papel nga nagapanawagan sa paghagan-hagan sang away kag ceasefire sa Ukraine, apang pareho nga ginbasura sang Kyiv kag sang kaalyado nga mga pungsod sa West bangud nagapati sila nga paagi ini agud mahigot sa interes sang Russia.
Sa natalana nga byahe ni Putin sa Beijing, lauman nga istoryahan sang duha ka presidente ang bilateral trade kag economic cooperation kag iban pa nga global issues.#
