Naglapaw na sa 2,000 ka mga tawo ang nagkalamatay matapos ang 6.3-magnitude nga linog nga nagtay-og sa western Afghanistan.
Ang sentro sini nga linog sang tinalikdan nga weekend ang yara sa 40 kilometros nakatundan sang Herat city sa western Herat province nga amo ang ikatatlo sa pinakadaku nga syudad sa Afghanistan. Nabatyagan man ang pagtay-og sa kaiping nga mga probinsya sang Badghis kag Farah nga ginsundan sang aftershocks.
Photo Courtesy: AP/Ebrahim Noroozi
Suno kay Taliban spokesman Zabihullah Mojahid, nagsaka na sa 2,053 ang nagtaliwan kag masobra naman 1,240 ka mga tawo ang nagkalasamaran.
Masobra man 1,300 ka mga balay ang nagkalaguba apang tanan ini nga numero ang posible nga magsaka pa.
Suno pa sa Taliban, nakalab-ot na ang rescue teams sa probinsya sang Herat kag napadala naman sa mga residente ang kinahanglanon nga pagkaon, tubig, bulong, kag mga panapton.
Nahibaluan nga sunod-sunod nga linog ang gina-suprer sang Afghanistan sini lang nga binulan nga naglubong pa gid sa pungsod sa tunga sang gina-atubang sini nga krisis sa ekonomiya.
Isa ini sa pinakapigado nga pungsod sa Asya kag labi pa nga nagluya ang abilidad nga mag-responde sa mga kalamidad halin sang gin-agaw sang Taliban ang pwesto sang gobyerno sang 2021.
Kasunod sang amo nga hitabo, gin-untat sang Estados Unidos sang Amerika ang kapin $7-billion ukon P396.8-billion sini nga ginahatag sa foreign reserves sang Afghanistan nga rason nabudlayan ang pungsod sa paghatag ayuda sa ila nga mga residente sa tion sang kalamidad. #
