ILOILO CITY – Ginkumpirma sang Philippine Embassy sa Israel nga nagasugod na sa paggutok ang temporary shelters para sa ginpang-rescue nga Filipinos nagikan sa nagapadayon nga inaway sa tunga sang Israel kag sang militante nga grupo nga Hamas.
Suno kay Consul General kag Deputy Chief of Mission Anthony Mandap, nagapangita na sila subong sang pasilidad nga istaran sang mga nagpalagyo nagikan sa kinagamo.
Pahayag niya, ang mga hotel ang ginagamit man sang mga soldado gani, nagakabalaka sila nga maubusan sang shelter para sa mga Filipinos.
Ang Israel ang nangin puluy-an na sang halos 30, 000 ka mga Filipinos kun sa diin, ang kalabanan sa ila ang yara sa Tel-Aviv.
Nagapabilin ini sa alert 2, buot silingon, wala ginapahanugutan ang non-essential movements, ginalikawan ang mga lugar nga may protesta kag ginapahanda na ang mga Filipinos sa posible nga evacuation.
Base sa data nagikan sa Department of Foreign Affairs, may kabilugan nga 135 ka mga Filipinos sa Gaza nga yara subong sa Alert Level 4 ukon ginapatuman ang mandatory repatriation.
