ILOILO CITY – Ginkumpirma sang Hamas kag sang Russian state media nga nagpakig-istorya ang Hamas delegation sa isa ka senior Russian foreign ministry official may kaangtanan sa pag-release sang mga hostages nga ginakaptan sang Hamas.
Lakip sa mga nag-istoryahanay amo sanday Mousa Abu Marzouk, deputy chief sang political bureau sang Hamas, Basem Naim nga isa pa ka senior Gaza-based Hamas leader, deputy foreign minister sang Russia kag Special Presidential Representative for the Middle East and Africa nga si Mikhail Bogdanov.
Suno sa Russia, ini ang kabahin sang panawagan sang ila pungsod nga gilayon nga hilwayon ang mga foreign hostages sa Gaza Strip lakip na ang Russian hostages.
Ginkondenar naman sang Israel ang nasambit nga pagsinapol suno sa Israeli Ministry of Foreign Affairs.
Suno sa Israel, ini ang akto sang pagsuporta sa terorismo kag nagatolerar sa kinagamo nga ginatuga sang Hamas terrorists.
