Lapaw pa sa 80 ka mga barangay sa Iloilo City ang nagapabilin nga “uncleared” sa iligal nga droga.
Sandig sa pinakaulihi nga rekord sang Iloilo City Police Office (ICPO), 11 diri ang sakop sang Police Station 1 ukon sa City Proper; 23 sa Police Station 2 ukon sa La Paz; 21 sa Police Station 3 ukon sa Jaro; 14 sa Police Station 4 ukon sa Molo; siyam sa Police Station 5 ukon sa Mandurriao; kag walo sa Police Station 6 ukon sa Arevalo.
Sa interview sang Bombo Radyo kay Pol. Lt. Col. Antonio Benitez, Jr., head sang City Intelligence Unit sang ICPO, iya ginpahayag nga ang ginatutukan sang mga pulis amo ang pagkumpiskar sa iligal nga droga sa mga “bodegero” antes pa man ini maglab-ot sa street-level individuals ukon drug pushers.
Suno kay Benitez, ini ang rason kun ngaa daku nga mga items ang ila ma-recover sa mga operasyon.
Ang pinakaulihi nga daku nga operasyon sa Iloilo City amo ang natabo sa isa ka subdivision sa Barangay Camalig, Jaro, Iloilo City sang nagligad nga gab-i kun sa diin tatlo ang arestado kag nakuhaan sang 17 ka sachets sang suspected shabu nga nagabug-at sang tatlo ka kilo kag may balor nga nagdangat sa P20.4-million. #
