Gindul-ong na sa iya katapusan nga palahuwayan si Police Staff Sergeant Michael Malan, ang team leader sang Special Weapons And Tactics (SWAT) team sang Iloilo City Police Office nga natiruhan sang subject sa drug buy bust sa Barangay Concepcion, City Proper sang nagligad nga Oktubre 29.
Napun-an sang kalisod ang lubong sa Forest Lake Memorial Park sa Mandurriao nga gin-updan man sang ginatos ka mga tawo lakip na ang iya nga pamilya, mga abyan, classmates, kag mga ka-trabaho.
Ginkilala naman sang hanay sang pulisya ang dedikasyon ni Malan sa iya trabaho bilang pulis kag ang pagkabaganihan sini sa amo nga adlaw.
Sa statement ni Iloilo City Police Office (ICPO) director Police Colonel Joeresty Coronica, iya ginpahayag kun ano ka daku nga ehemplo si Malan sa PNP ilabi na sa kampanya kontra sa iligal nga droga.
“‘Pag ang pulis magtinamad sa kampanya kontra iligal nga droga, ano bala ang titulo naton sang una [sa Iloilo City]? Shabulized,” suno pa sa natungdan.
Gindugang sini nga indi lamang problema sang pulis ang paglapta sang illegal drugs kundi katungdanan sang bilog nga komunidad. “Basically all of us have the responsibility to fight this cancer in our socirety… by way of drug reduction, demand reduction.”
Ginpahangop man sini nga indi pulis ang kontra sang sosyudad kundi ang durugista.
“Bilang amay sang unit sang ICPO, masakit,” kabahin sang ulihi nga statement ni Coronica sa lubong ni Malan.
Matandaan nga ang naka-tiro patay kay Malan amo si Glen “Bongbong” Yturriaga nga nagsungka man sang otoridad makaligad ang pila ka oras nga standoff sang adlaw nga ginpatigayon ang operasyon.
Nakuhaan man ini sang masobra P7 million nga balor sang iligal nga droga sang amo nga adlaw. Gindakop man ang iya kaupdanan nga sanday alyas Ivan kag alyas Kate. Ang tatlo ang pareho na nga napasakaan sang kaso. #
